ගිය ආණ්ඩුවෙන් දෙන්න ගිය ගුරු පත්වීම් 500ක් අලුත් ආණ්ඩුවෙන් අත්හිටුවයි.

0
564
- Advertisement -

ගුරු පත්වීම් ලිපි ලබාදීම හදිසියේ දින නියමයක් නොමැතිව අත්හිටුවීමෙන් තමන් දැඩි අසීරුවට ලක්වූ බව සබරගමු පළාතේ නව ගුරුපත්වීම් ලැබීමට තෝරාගත් උපාධිධාරීහු අද (16) පැවසූහ.

ප‍්‍රාථමික අංශයේ ගණිතය, ඉංග‍්‍රීසි සහ උසස් පෙළ විෂයයන් සඳහා සබරගමු පළාතේ පාසල් සඳහා පත්කිරීමට තරග විභාගයක්ද පවත්වා මෙම උපාධිධාරීන් 500ක පිරිස තෝරාගෙන තිබුණේ මීට වසර එකහමාරකට පමණ පෙරදීය.

ඔවුන්ට පත්වීම් ප‍්‍රදානය අද (16) පැවැත්වෙන බව සබරගමු පළාත් සභාව මගින් දන්වා තිබුණි. එහෙත් පසුගිය බ‍්‍රහස්පතින්දා නැවත ලිපියක් මගින් දන්වා තිබුණේ මෙම පත්වීම් ලබාදීම තාවකාලිකව අත්හිටුවා ඇති බවයි.

මෙම පිරිසෙන් 150,-200ත් අතර පිරිසක් අද සබරගමු පළාත් සභා සංකීර්ණයට පැමිණ සිටියහ. සමහරු පැවසුවේ පත්වීම් ලබාදීම අවලංගු කළ ලිපිය තමන්ට මෙතෙක් නොලැබුණ බවයි.

උපාධිය ලබා අවුරුදු පහ හයක් වන අය ද මෙම පිරිස අතර සිටිති. රජයේ රැකියාවක් නොලැබීම නිසා පෞද්ගලික අංශවල රැකියාවල සේවයේ නියුතු උපාධිධාරියෝ ඒ අතර සිටිති. අද(16) තමන්ට ගුරු පත්වීම් දෙන බවට ලිඛිතව දන්වා තිබූ නිසා එතෙක් පෞද්ගලික අංශවල කළ රැකියාවලින්ද අස්වු බව ඔවුහු කීහ.

“අපිට කබලෙන් ලිපට වැටුණා. කරගෙන ආපු රස්සාවත් නෑ. අලූත් රස්සාවත් නෑ. මානසිකව අපි විශාල පීඩනයකට ලක්වුණා. අපි විභාගය ලියලා සුදුසුකම් තියන අය. අද පත්වීම් ලිපි නොදෙන්න හේතුව කවුරුවත් කියන්නේ නෑ. දෙන දිනයක් ස්ථිරව කියන්නෙත් නෑ. අපි හරිම අමාරුවක වැටුණේ” පත්වීම් ලිපි ලබාගැනීමේ බලාපොරොත්තුව පැමිණ සිටි උපාධිධාරීහූ රත්නපුර නව නගරයේ සබරගමු පළාත් සභා සංකීර්ණයේදී පැවසූහ.

මේ සම්බන්‍ධයෙන් සබරගමු පළාත් ආණ්ඩුකාර ටිකිරි කොබ්බෑකඩුව මහතානේ විමසූවිට ඔහු පැවසුවේ 2020 ජනවාරි මාසය තුළ මේ පත්වීම් අනිවාර්යයෙන්ම ලබාදෙන බවයි. පත්වීම ලද ස්ථානය එයම බවත් කිසිදු වෙනසක් නොවන බවත් මෙම පත්වීම් ලබාදීම තාවකාලිකව අත්හිටුවීමක් මිස දේශපාලන බලපෑමක් මේ පිටුපස නැති බවත් ආණ්ඩුකාරවරයා අවධාරණය කළේය.

අලූත් අවුරුද්දේ ඉස්කෝලෙ යන ළමයින්ට ගුරුවරු අඩුපාඩු තියෙන්න බෑ. හැම විෂයකටම හැම පන්තියකටම ගුරුවරු ඉන්න  ඕනෑ. අලුත් අවුරුද්ද ලබලා අලූත් පන්තියට යනකොට මෙතක් විෂයයන්ට නොහිටි ගුරුවරු පත්කිරිමයි අපේ අරමුණ. ඒ හින්දා සැකයක්, අවිශ්වාසයක් තියාගන්න එපා ජනවාරි මාසේ ඇතුළත අනිවාර්යයෙන්ම මේ අයට පත්වීම් ලබා දෙනවා” ආණ්ඩුකාරවරයා කීවේය.

lankadeepa.lk වෙතින් උපුටාගැනීමකි.

LEAVE A REPLY

Please enter your comment!
Please enter your name here

19 − 6 =